kash ke phoolon par apna
danturit haas bikherti yah sharadkaleen hawa
tie aur kamij ke bheetar
mere wakshasthal ke saphed baalon ko sahla jaati hai .
main use waise dekhata hoon
jaise vyaktigat sachiva banane ke liye antarweeksha dene aayee
kisi aatur utkanthit bala ka koi
sambhawanaon se bhara aabhasi pratibimb !
chalee gayee chilchilati dhoop ki
swedil dupaharee ,
chale gaye saawan - bhadon ke
shyamal-nam maas,
phir se simatane lage hain
plawit nadiyon ke twaran-vikal paaon.
sharad ke nirabhra aasamaan kee yah sheetal hawa
aparahn kee peeli dhoop par machalti hai
jaise
karyalaya kee kaleen par
antarweeksha kee prateeksha rat bhawee preyasee ke paaon .
ab aur naheen;
uthata hoon telephone
aur poochhane lagta hoon
vargeekrit vigyanpan kee nayee daren .
No comments:
Post a Comment